【日本德島縣食買玩攻略】九大必食必買必玩主題！任摘士多啤梨、賞櫻、探索秘景，再到筷子製作體驗！Bookmark疫情過後出發！
好想返「鄉下」呀！！嚟緊4月就係櫻花季，去唔到日本賞花，都可以睇吓相回味一吓！小編今次就整理咗德島縣九大必食必買必玩嘅地方！大家可以bookmark低，等疫情過後再去啦！由任摘士多啤梨、賞櫻、探索秘景，再到筷子製作體驗都應有盡有！
香甜多汁「任摘士多啤梨」
由1月至5月都係德島縣日本士多啤梨當造嘅時間，梗係要搵啲任摘士多啤梨農場，狂食啦！德島縣出產嘅品種有紅頰、幸之香等十幾種士多啤梨，款款都香甜多汁～而呢類農場主要位於鳴門市及三好市，而唔同品種嘅士多啤梨分別種於唔同地方，咁就可以避免人多擠迫之餘亦唔洗擔心會摘完！
德島縣內賞櫻名所推介
春天去日本就大嘅目的一定係賞櫻啦！「德島中央公園」內嘅德島城博物館前廣場中心就種植咗約250棵嘅染井吉野櫻，除咗日頭，亦都有晚櫻可以觀賞，俾射燈照射嘅護城河同櫻花，充滿住夢幻氣氛～由JR德島站步行約10分鐘就可以去到，非常之方便！
位於德島縣南部美波町嘅藥王寺係四國八十八箇所嘅第23札所。除咗係催吉避凶嘅寺廟外亦係賞櫻名所，喺呢到可以一次過睇晒三種櫻花：八重櫻、染井吉野櫻、山櫻，一到櫻花季就有滿山櫻花迎接參拜者。
另外，芝櫻亦都係近年比較受歡迎嘅「櫻花」，唔係生喺樹上面，而係佈滿地下，桃紅色+粉色嘅花，似足櫻花！打卡勁靚，勁吸引！嚟到德島縣可以喺美馬市脇町嘅廣棚地區搵到芝櫻，一大片好似地氈咁～
古城今賞「卯建房屋街道」
想感受古色古香嘅日本，推介大家到卯建房屋街道，於江戶時代起，卯建房屋街道就因為吉野川水運，成為繁盛嘅藍染商品貿易地方。當時商家更會用象徵富裕「卯建」作為防火牆建造房屋。由江戶時代中期至昭和時代初期期間就興建咗長達430米歷史建築群，行走其中可以感受到歷史變遷。強烈建議大家可以揀日落時分嚟，金黃色嘅日落景色配埋街道上柔和街燈，充滿歷史美感！呢到仲可以體驗製作美馬和傘，非常之獨特嘅日本風情體驗～
日本三大秘境「祖谷」祖谷藤蔓橋
位於秘境祖谷嘅藤蔓橋係日本三大奇橋之一，由軟棗獼猴桃嘅藤蔓編織而成，傳聞係因為平家族人為防止追兵趕上，所以使用隨時都可切斷嘅藤蔓橋。不過藤蔓編織嘅橋，要行喺上面都真係要唔少膽量架！每行一步橋身都會搖擺，極驚驗刺激！從上俯瞰祖谷川非常之靚，每季都有唔同景色，吸引唔少人到訪架！橋身長45米、闊2米、距離水面14米，每3年會重新架設一次，大家可以安心行～
桐下駄ｘcafe「三加茂喫茶」
「下駄」其實係日本傳統鞋嘅一種，一般都係譯做「木屐」，但其實當中款式同種類都有唔同～創業逾100年嘅桐下駄工場，係用日本桐材主要製作成東三好町傳統工藝品「桐下駄」、底部突起嘅「一本歯下駄」及被當作護身符嘅「豆下駄」等等。喺東三好町嘅三加茂喫茶可以報名參加豆下駄製作體驗，揀自己鍾意嘅鼻緒款式製作自己獨一無二嘅豆下駄啦！送禮自用都一流～
與森林共存五稜筷子製作體驗
位於德島縣南部嘅那賀町，係日本三大美林之一，由於森林如果欠規劃會受風雨影響而成為災害問題，為咗保護樹林而定期採取必要嘅砍伐，喺伐木後會加工製作成筷子及鎖匙扣等商品。當中用木頭杉削成五角形嘅「五稜筷子」，係歡迎大家一齊參與製作架！嚟到製作獨一無二嘅筷子，不問國籍、年齡任何人都可以樂在其中。
坐西日本最長「太龍寺纜車」登西之高野「太龍寺」
四國山脈東南端、高618米太龍寺山山頂附近嘅地方被稱為「西之高野」，弘法大師曾於西南方約600米嘅「舍心嶽」岩石上修行之事而被傳頌。本來對於巡禮者嚟講係屬於艱難嘅路段，不過由1992年「太龍寺纜車」開通之後登山參拜就變到輕鬆簡單啦～全程由道之駅「鷲之里」連接至太龍寺，係西日本最長（全長2,775米）纜車，乘坐期間仲可以欣賞溪谷美景～
可持續發展「零廢物環保中心」
德島縣上勝町喺2003年訂下「零廢物」、達到社會可持續發展目標，將垃圾分成45類以上。而家廢物回收率已經高達80%，吸引唔少國內外相關人士到此拜訪學習。而零廢物環保中心嘅設立就係作為垃圾分類體驗、資訊發佈、研究、教育嘅地方。垃圾分類場所收集當地居民分成45類以上嘅垃圾，回收可再次使用嘅垃圾，達致減少垃圾嘅目的。回收店GURUGURU店會收集上勝町居民棄置物，但任何人都可以帶走該店嘅棄置物～入住中心內「HOTEL WHY」，可以體驗垃圾分類、按需要取相應份量番梘及咖啡豆、以及免費參加遊學團。另外，亦可以在勝浦川釣魚、水霸湖進行SUP體驗、登山、求生遊戲等各種戶外活動。體驗「零廢物」、親近大自然。
世界首款DMV（Dual Mode Vehicle）
DMV（Dual Mode Vehicle）係嚟緊德島縣一款好特別嘅交通工具！佢可以喺路面及路軌行走，將汽車同列車合而為一，預計今年秋季開始行駛！轉換至路軌行走嘅時候，會進行15秒嘅「Mode Inter Change」變成鐵路模式，放下路軌專用車輪，好似Transformers咁，鐵路迷一定要留意啦！鐵路模式會行走於阿波海南站（德島縣）至甲浦站（高知縣）之間，巴士模式就行走於阿波海南文化村等觀光景點，相信大家下次去德島縣旅行就可以坐到啦！
