受到疫情的影響,大家已經好耐冇得「返鄉下」啦!開關後想第一時間到訪心心念念嘅日本嘅話,嚟一場東北地方嘅治癒系旅遊點睇?呢到唔單只有壯麗嘅自然景觀,仲有古色古香嘅溫泉地同歷史建築,治癒你久未出遊而乾涸嘅心~

關於東北

日本東北地方涵蓋青森縣、秋田縣、岩手縣、宮城縣、山形縣同福島縣六個縣。日本四季分明:春天賞櫻、夏天觀綠、秋天看楓、冬天品雪,無論幾時嚟東北都可以觀賞到不同嘅風景面貌,係非常正嘅旅遊熱點。

下圖係本篇中會介紹嘅景點嘅地理位置,俾大家參考吓,安排行程個陣就更方便啦!


宮城縣

宮城縣鄰近海邊,又有群山同平原,自然景觀變化多端。加上擁有許多文化遺產、溫泉同祭典,一直以來都深受遊客歡迎。

#1 風光明媚觀光路線 藏王生態線公路

要盡情享受自駕遊嘅樂趣,可以選擇喺觀光公路上面兜風,一邊駕車馳騁,一邊欣賞沿途風光明媚。橫貫藏王群山嘅藏王生態路公路全長26公里,途中可以喺瀧見台眺望三階瀑布同不動瀑布,壯觀嘅群山同盛夏嘅新綠相映成趣,好治癒~

呢個紅色大鳥居就係藏王生態線公路嘅起點

公路途中嘅瀧見台可以眺望到三階瀑布同不動瀑布。

三階瀑布嘅其中兩級。一片墨綠中突然出現泛白嘅瀑布就好似一道刀痕硬生生將高山劈開兩半。

天氣好嘅話可以睇到更遠嘅不動瀑布。

大黑天嘅火山地質嘅面貌

 

藏王生態線公路(蔵王エコーライン)
地址:宮城縣藏王町
※冬季(11月上旬〜4月中旬)有禁止通行期。


#2 神秘火山口湖 藏王御釜

御釜係由藏王刈田岳、熊野岳、五色岳包圍嘅圓型火山口湖,又名五色湖。最近一次嘅火山噴發喺1918年,造成湖水反覆沸騰。湖水呈強酸性,一早已經唔適合生物生長,所以湖中並冇生物棲息。由於御釜嘅地型特殊,有一種自成一角嘅神祕氣息,令人著迷。

御釜位於火山地帶,附近鮮有植物生長,睇落去荒蕪一片。

御釜嘅湖水呈碧綠色,有一種深不可測嘅氣氛。

御釜嘅天氣變幻莫測,一秒前仲清晰可見嘅御釜,下一秒即被濃霧覆蓋,睇唔睇得到要靠啲運氣啦~

山頂處有藏王刈田嶺神社,小小一間卻十分莊嚴。

 

藏王御釜 (蔵王山頂レストハウス)
地址:〒989-0916 宮城県刈田郡蔵王町遠刈田温泉倉石岳国有地内国有林内


#3 進駐武士的家!村田町武家屋敷

村田町有十分悠久嘅歷史,至今仍保存咗許多傳統嘅建築,包括武士住宅同日本傳統倉庫。遊客散步喺充滿思古情懷嘅村田町仍覺得意猶未盡嘅話,可以考慮喺舊時武士嘅古民家-村田町武家屋敷𥚃住上一晚,體驗當時武士嘅生活。

村田町武家屋敷 舊田山家,現為全棟租借旅館。

屋內保存了舊時嘅模樣,十分懷舊有格調。

日頭可以喺村田町武家屋敷附近嘅日式倉庫街道上散步。

呢種日本傳統倉庫建築名叫土藏。

你仲可以喺傳統嘅土藏享用晚餐!呢家Le Conon藍使用唔經化學農藥耕作嘅蔬果,可以食得安心又放心。

呢到嘅料理大多用橄欖油,檸檬汁同醋嚟調味,清爽之餘又唔會掩蓋食材本身嘅鮮味~

 

村田町武家屋敷(舊田山家)
※只限包場住宿,最多9人
費用(連稅)/1泊

1人入住 10,000日圓
2人入住 19,000日圓
3人入住 27,000日圓
4人入住 34,000日圓
5人入住 40,000日圓
6人入住 45,000日圓
7人入住 49,000日圓
8人入住 52,000日圓
9人入住 54,000日圓

地址:〒989-1305 宮城県柴田郡村田町大字村田西66番地3
預約網頁:http://bukenooyado.com/

 

Le Conon藍

地址:〒989-1305 宮城県柴田郡村田町大字村田字町35
咖啡室營業時間:11:00~17:00
(部分菜單需要1週前預約,敬請留意)

休息日:星期一、二、三


岩手縣

岩手縣係全日本排名面積第二大嘅都道府縣,東面太平洋,西靠奧羽山脈,有好山好水,唔只可以觀賞到豐富嘅自然景觀,新鮮味美嘅海鮮料理亦係另一大魅力!

#1 乘舟遊覽日本百景名勝 猊鼻溪

猊鼻溪位於岩手縣嘅一關市,呢到嘅溪谷美景係日本國內首屈一指嘅,更被選定為日本百景之一。猊鼻溪中嘅「猊」意指獅子,因為溪谷出口處嘅鐘乳石被侵蝕後嘅樣生得好似獅子嘅鼻而得名。猊鼻溪延綿約2公里,兩旁係高聳而立嘅奇岩怪石,遊客可以坐上木舟,喺船夫嘅導覽下細細欣賞沿溪嘅風光景致。

喺船夫嘅導覽下欣賞沿猊鼻溪。

呢次嚟嘅時候係盛夏,喺木舟上被一片翠綠包圍,偶有微風吹拂,喺炎熱嘅天氣都可以感覺到一絲涼意,令人好享受。

溪旁有一個小神社。

舟船駛到折返點嘅時候,會有大約20分鐘嘅散策時間,大家可以落船行吓。盡頭處就係峽谷嘅出口,正正係猊鼻溪名字由來嘅地方。喺岩壁有一個許願洞,聽講如果將許願球成功丢進洞內嘅話,願望可以實現呢!大家都嚟挑戰一吓啦~

共有十種許願球,分別係戀、愛、福、壽、運、緣、絆、財、祿、願,五顆許願球100日圓。

小編買咗其中五顆,試試運氣~

許願洞距離岸邊大約30米,洞口又非常小,小編出盡吃奶嘅力氣都投唔到入洞(哭)

 

猊鼻溪
地址:〒029-0302 岩手県一関市東山町長坂字町467
費用:1800日圓(大人)
900日圓(小學生)
200日圓(3歲以上幼童)
船程:全程約90分鐘


#2 重現昔日古民家面貌 遠野故鄉村

遠野故鄉村將舊時嘅岩手縣傳統農民家「南部曲家」重建,以重現昔日古老山村嘅面貌,令人可以體驗到江户、明治時代嘅農民生活。遠野故鄉村佔地8.8公頃,村內有曲家・直家共7間,由外觀到室內陳設都係舊日嘅模樣,遊客可以自由入內參觀。喺呢到散散步,睇睇四周風景如畫嘅山間、古色古香嘅農民家,有一種時光靜靜流淌嘅感覺,治癒非常。

南部曲家嘅外觀,呈一個L字型。

屋內放咗一個比人仲高嘅稻草人偶。

以前嘅南部曲家係人與馬住喺同一屋簷下,所以呢到都養咗馬,俾大家更能體驗當時嘅生活。

村內嘅田園風光非常靚,靜謐而美好。

 

遠野故鄉村
地址:〒028-0661 岩手県遠野市附馬牛町上附馬牛5-89-1
入場費:550日圓(一般)
330日圓(小/中/高中學生)
開村時間:3月~10月 9:00~17:00(最後入園時間為16:00)
11月~2月 9:00~16:00(最後入園時間為15:00)


#3 創意滿分! 裝在牛奶樽𥚃的鮮味

「瓶丼」故名思意是瓶子入面嘅丼飯,係岩手縣宮古市嘅名物。瓶丼源自岩手縣嘅特產牛奶樽海膽,岩手縣盛產海膽,當地嘅漁民會在捕獲到海膽後,將海膽放入牛奶樽,除咗可以保存鮮味外,更可保持海膽嘅形狀。後來岩手縣民更將這個想法延伸到其他海鮮,將唔同嘅三陸海產放進瓶子,要食嘅時候就將瓶內嘅海鮮倒喺白飯上,便成咗既美味又有趣嘅「瓶丼」啦~

瓶丼定食:1500日圓。

只要將瓶子入面嘅海鮮倒喺白飯,就會變成海鮮蓋飯啦!

秋鮭、海帶同鮭魚籽嘅瓶丼。

將蓋飯食得七七八八,仲可以換種口味,將帆立貝同昆布熬成嘅高湯加入飯,變成一道茶漬飯。

淨土濱休息所旁就係淨土濱,係宛如極樂淨土之美。

 

淨土濱休息所 【浜処うみねこ亭】
地址: 〒027-0001 岩手県宮古市日立浜町32
餐廳營業時間: 10: 30〜14: 30(last order)


#4 親親大自然住宿體驗 安比高原上豪華露營

近年豪華露營(Glamping)漸露頭角成為唔少人鍾意嘅郊遊體驗。去東北旅遊想一試喺日本大自然中感受「有態度」嘅住宿體驗,就要嚟安比高原啦!喺岩手縣安比高原上嘅安比格蘭酒店除咗提供一般嘅酒店住宿,仲有豪華露營營地,等你可以喺廣闊嘅草原上同星空共眠,十分寫意!

草原上設有幾處營帳。營地廣闊,營帳間相距一定嘅距離,可以時刻避開3密。

工作人員幫忙準備燒烤晚餐嘅炭火。

燒烤晚餐非常豐富,由前菜、排類,到甜點都一應俱全。

掀起紗帳可以睇到兩張單人床。帳蓬内空間唔少,媲美酒店房間架!

 

安比格蘭酒店【ホテル安比グランド】
地址:〒028-7306 岩手県八幡平市安比高原
費用:豪華露營一晚連燒烤晚餐 8500日圓起~
豪華露營詳情(日文):https://www.appi.co.jp/glamping/


青森縣

青森縣係日本本洲最北嘅縣,除咗有名嘅自然景點,還有流傳已久嘅傳統工藝同祭典等著住你去發掘,係一處魅力四射嘅旅遊勝地。

#1 細味如畫的療癒 奥入瀨溪流

被評為國家指定特別名勝同天然記念物嘅奥入瀨溪流,全長約14公里。清澈嘅溪流形態千變萬化,茂密嘅森木層遞出嘅樹蔭猶如隧道一般,即使係夏季都可以感到一股涼意,係有名嘅避暑勝地。慢步喺如畫嘅溪流旁,享受住森林浴同動人嘅景緻,係嚟自大自然嘅治癒,令人暫且放下營營役役,好好放鬆一回。

淙淙流水非常有躍動感,連聲音都好治癒。

呢到孕育住多樣嘅青苔,富有生趣。

陽光透過樹蔭灑落,十分舒適。

銚子大瀑布,係遊客必到嘅秘景。

 

奧入瀨溪流 石户休憩所 (溪流散策起點)
地址: 〒034-0301  青森県十和田市奥瀬字惣辺山1


#2 乘坐遊覽船 觀賞十和田湖風光

十和田湖橫跨青森同秋田兩個縣,係由於十和田火山噴發而成嘅二重火山口湖,嚟青森旅遊嘅話一定不容錯過。想仔細欣賞十和田湖嘅湖光山色,大家可以乘坐遊覽船,喺偌大嘅湖泊上航行,十和田湖景嘅藍同綠,伴隨夏日微風,合奏一場顏色同感觀嘅交響曲。

湖水十分清澈,呈現一種寶石般嘅藍色。

十和田湖嘅湖水碧藍清徹,湖畔係優美嘅山巒風光。

 

十和田湖畔休屋
地址: 〒018-5501 青森県十和田市奥瀬十和田湖畔休屋486
航行路線: A路線 休屋⇆子之口
B路線 休屋⇆休屋
票價: 成人 1430日圓
兒童 720日圓


#3 入住主題公園般的旅館 「星野渡假村 青森屋」

想更徹底嘅體驗青森文化嘅樂趣,入住青森縣三澤市嘅「星野渡假村 青森屋」可能係一個好選擇。「星野渡假村 青森屋」係以體驗青森文化為主題嘅渡假村酒店,呢到佔地頗廣,除咗基本嘅酒店設施,酒店範圍內更有公園、溫泉、南部曲家;仲可以體驗各種活動,當中最吸引眼球嘅就係「青森四大祭典」表演。呢到活像一個青森嘅主題公園一樣,令你完完全全嘅被青森文化包圍住!

「青森四大祭典」表演嘅舞台佈置咗好多青森祭典嘅擺設,一入嚟就感受到祭典嘅氣氛。

表演者正賣力還原四大祭典嘅舞蹈同音樂。據講表演者都係酒店嘅員工,早上幹活,到了表演時間便出嚟獻技呢!真係要俾啲掌聲~

館內有借浴衣嘅服務,大家可以揀一套自己鍾意嘅著,影啲打卡相~

館內有一棵「蘋果樹」,只係打開上面嘅水龍頭,就得到一杯清甜可口嘅青森蘋果汁了~

酒店仲有好多唔同嘅體驗活動,小編就試咗釣帆立貝,三分鐘內成功釣到兩隻嘅話,就可得到獎品一份。(帆立貝太重啦,小編只成功釣起了一隻TT)

酒店內除咗提供一般嘅自助早、晚餐,仲可以揀到酒店內嘅南部曲家古民家餐廳,享受另一種等級嘅美食。

青森鄉土料理草莓煮(鮑魚同海膽嘅湯品)、刺身拼盤、炸蔬菜蝦球、前菜拼盤。

粟米意大利雪糕、燒牛肉野菜佐紅酒黑加倫汁、冷蕎麥麵、翡翠蒸豆腐。

用電話掃描QR code點開青森屋開發嘅網址就可以即時得知大浴場嘅混雜程度,綠色係「少人」;黃色係「有人但不混雜」;紅色係「混雜不建議使用」。去浸溫泉之前先查看狀況,就可避免3密,十分方便呢!

 

星野渡假村 青森屋
地址: 〒033-0044 青森県三沢市古間木山56


秋田縣

秋田縣西面日本海,其餘三方被高山包圍,山林景色非常壯麗。秋田縣還有豐富的歷史景點和特色的傳統工藝品,自然與文化兼備。

#1 時光倒流到武士時代 角館武家屋敷

角館素有「奧州小京都」之稱,呢到保存咗唔少武士住宅,將江户時代古典嘅城下町風貌喺現今盡情體現。來角館武家屋敷不僅僅能一睹過去氣派嘅武士住宅例如青柳家、石黑家等,你仲可以到訪角館樺細工傳承館,欣賞由18世紀已經存在嘅傳統工藝。散步喺呢個充滿歷史文化氣息嘅舊街道上,穿梭於武士住宅之間,有一種彷如時光倒流返到古代一樣嘅感覺。

舊青柳家

人力車伕仲會擺好姿勢俾大家拍照架~

人力車伕會一邊走,一邊介紹沿途嘅建築物同歷史小知識。

樺細工係一種日本傳統工藝,利用櫻花樹皮製作出唔同嘅木工工藝品。

館內亦展出好多由有名匠人製作嘅工藝品。

如果肚餓,可以到附近嘅百穗苑,品嚐一餐傳統嘅角館鄉土料理

角館名物日式粟子飯套餐:3000日圓(不連稅)。

套餐仲包含三大烏冬之一嘅秋田縣名物ー稻庭烏冬。

 

角館歷史村 青柳家
地址:〒014-0331 秋田県仙北市角館町表町下丁3
入場費:500日圓(大人)
300日圓(高中生、中學生)
200日圓(小童)
營業時間:冬季  900〜17:00
夏季 9:00〜16:30
收費町營停車場:〒014-0359 秋田県仙北市角館町北野97−1

樺細工傳承館
地址:〒014-0331 秋田県仙北市角館町表町下丁 10-1
入場費:300日圓(大人)
150日圓(中・小學生)
免費(兒童)
開館時間:4月~11月 9:00~17:00(最終入場時間為16:30)

12月~3月 9:00~16:30 (最終入場時間為16:00)

休館日: 12月28日~1月4日
收費町營停車場:〒014-0359 秋田県仙北市角館町北野97−1

百穗苑
地址:〒014-0333 秋田県仙北市角館町川原町23


#2 八幡平盾形火山線

八幡平盾形火山線係一條貫穿岩手縣同秋田縣嘅山岳觀光公路,全長27公里。呢到四季都可以觀賞到唔同嘅景色,春天係粉嫩櫻花,夏天係一片翠綠,秋天係漫山紅花,冬天有雪之回廊。揸車喺呢條路線兜風,欣賞沿路風光如畫嘅十和田八幡平國立公園嘅美景,係自駕遊嘅一大樂趣。

沿路可以眺望到有「東北富士山」之稱嘅岩手山。

八幡平山頂休憩處

 

※冬季(11月上旬〜4月中旬)有禁止通行期。


同場加映 自駕遊租車流程教學

行前準備

1)  確保持有有效嘅國際牌照,詳情請上香港運輸處查詢。
2)  決定行程地點及日期後,便可到租車公司網站預約。預約時需事先揀選租車日數,取車及還車地點,亦可選擇自己鍾意嘅車款同配件。

大多租車公司都有中文和英文版支援,不諳日文也能輕鬆預約。

Nippon Rent a car (中文網站)

前往取車

1) 拎埋國際牌照前往已預約取車嘅店舖。

2) 店員確認你嘅預約後會影印一份你嘅護照、國際牌照嘅副本。

3) 店員向你說明注意事項,同保險方案。Nippon Rent a car提供包括中文及英文嘅租車指南,有唔明白嘅地方可以細閱資料。

4) 付款。(部分公司只接受信用卡付款。)

5) 店員同你一齊檢查車輛外觀

6) 確定車輛冇問題後,就可以開始自駕遊了!


等疫情過後,嚟一場日本東北4縣嘅治癒自駕之遊,以慰藉一下久未出遊而感到苦悶嘅心靈啦〜

請Follow 東北旅遊的官方Instagram !