【日本中部深度遊】發掘長野+富山好食好玩好去處！六大必到景點詳細介紹！眼睛去旅行止下癮！

如果可以去返旅行，大家第一個想去嘅地方會喺邊？小編一定係揀日本！長野縣同富山縣擁有唔少自然景色，由東京出發坐一個半鐘新幹線就到長野，好方便！而講到富山縣就不得不提黑部峽谷同立山黑部等名勝啦！今次就同大家分享六大必到景點，記得bookmark定啦！小編覺得呢2個地方都好適合去放鬆，治療心靈～

鱒魚壽司博物館

呢間博物館係由今年110周年嘅鱒魚壽司老鋪「ますのすし本舗　源し」嘅本店，除咗可以參觀鱒魚壽司製作過程、相關展覽，仲可以報名參加鱒魚壽司製作體驗 (每位￥1,500)，有得睇有得玩，當然亦有得食啦！博物館設有餐廳同手信店，可以買到鱒魚壽司、便當同不定期推出嘅限定商品等等。

地址：富山縣富山市南央町37-6

交通：從富山站乘車約25分鐘，或從富山機場乘車約8分鐘

網址：http://www.minamoto.co.jp/museum

黑部峽谷小火車

日本第一深嘅V字峽「黑部峽谷」觀光小火車，四季景觀都非常震撼！春天新綠、夏天清流！特別推介大家秋天紅葉時期一定要去坐，遍山紅葉，令人嘆為觀止！小火車由宇奈月出發行駛至終點站櫸平，途中會經過黑薙、笹平、鐘釣3站單程行駛時間約為1小時20分鐘，途經主要景點：宇奈月站-新山彥橋、黑薙站-後曳橋、黑薙溫泉等。

路線及車費：(預定) 4月20日-4月30日 宇奈月-笹平 (來回) 成人￥1,320、小童￥660；5月1日-9日 宇奈月-鐘釣 (來回) 成人￥2,820、小童￥1,420；5月10日-11月30日 宇奈月-櫸平 (來回) 成人￥3,960 小童￥1,980

網址：https://www.kurotetu.co.jp/tw

庄川峽遊覽船

坐完小火車，可以轉換心情坐船，又係另一番風味！庄川峽嘅景色四季分明，春夏新綠、秋季紅葉、冬季白雪！分別有一小時來回小牧港至大牧溫泉路線及只需25分鐘小牧港同長崎橋之間嘅航班。最特別就係船內設有暖氣嘅室內座席以及上層開放式座席。天氣好的話，有如鏡面般嘅水面更會倒影出四周峽谷嘅美景！

地址：富山縣砺波市庄川町小牧73－5

營運時間‌：定期航線 平常8:30am-5:05pm，冬季9am-4:30pm，春季9am-5:05pm 收費：大牧温泉航線來回船票 成人¥2,800 小童 ¥1400、長崎橋周遊航線　成人¥1,000 小童 ¥500

交通：JR「高岡」站乘坐巴士至「小牧堰堤」站下車，車程約1小時30分鐘

網址：http://www.shogawa-yuran.co.jp/c/index.html

HAKUBA MOUNTAIN HARBOR

想由長野縣俯瞰北阿爾卑斯山就要嚟到呢個山頂露台，設置咗展望台及餐廳The City Bakery！打卡一流！最佳打卡位就無 Yoo-Hoo! Swing鞦韆，位於標高1,289m嘅山頂之上坐上高6米嘅鞦韆，盡覽北阿爾卑斯山連峰美景，真係少啲膽量都唔得呀！同樣推介大家特別秋天嚟，由玻璃展望台可以眺望偏佈紅葉嘅白馬三山同岩岳滑雪場！

地址：長野縣白馬村北城

交通：從 JR白馬站或白馬八方巴士站有期間限定穿梭巴士前往

網址： https://iwatake-mountain-resort.com

輕井澤玻璃工房

去旅行想買啲充滿心意嘅手信？不如自己親手整啦！喺輕井澤玻璃工房用​￥3,300起就可以參加吹玻璃杯體驗，有唔同顏色、形狀、模樣揀！初學者都唔需要擔心，會有識英文嘅導師指導同協助，需時約1小時，輕鬆整到靚靚玻璃杯！

地址： 長野縣北佐久郡輕井澤町長倉664-9

營業時間：10am-5pm

交通：JR「輕井澤」站轉的士約７分鐘

網址：http://karuizawaglass.o.oo7.jp

戶隱神社

戶隱神社由5座神社構成，分別為中社、奧社、九頭龍社、寶光社同火之御子社，如果要行勻全部5座神社約需3小時，大家可以根據時間同體力選擇步行路線。時間唔多嘅話不妨考慮由中社步行至鏡池，約需30分鐘。鏡池由戶隱山脈包圍，喺紅葉季節，池面會倒映出山巒紅葉顏色，超靚！另外，中社社殿天花上有名作「龍之天井繪」嘅復原圖亦推介大家去欣賞；而奧社表參道總長約二公里左右，兩旁矗立四百年巨杉，絕美嘅樹林景色！

地址：長野縣長野市戶隱 3506

交通：JR「長野」站 7 號巴士站乘經環形橋往戶隱高原方向巴士，車程約 1 小時

網址：https://www.togakushi-jinja.jp