【日本四國快閃遊】德島西部3日2夜之旅！食玩住樣樣齊！一文睇晒美食/景點/酒店！

呀～我全身想旅行！繼上次小編介紹過日本中部後，係咪覺得唔夠喉呢？今次就同大家介紹四國德島西部3日2夜之旅！由高松機場出發，搭搭機場巴士到高松車站再轉JR就可以去到德島西部（阿波池田站、大步危站）！講到玩，激流/行吊橋就夠晒刺激！必睇嘅有德島祖谷溪、大步危峽等自然美景！仲有得體驗手打蕎麥麵，食埋都仲得！跟住我哋，呢3日2夜一定超滿足！快啲bookmark定之後飛得再去玩！

Day 1

伐艇體驗：

鍾意刺激嘅你點可以放過激流！四國吉野川係世界數一數二嘅激流，啱晒玩橡皮艇/獨木舟！大浪隨時高達3米㗎，一定超好玩！怕危險嘅話，體驗期間都可以安排專人指導，咁就玩得放心啦！

祖谷溪：

V字形嘅「祖谷溪」係日本三大秘景之一，同時都係米芝蓮觀光指南兩星景點！由上面俯瞰祖谷川嘅溪流！岩石上面有一個「小憎石雕」，盛傳係以當年想挑戰膽量而企上懸崖上嘅小朋友/觀光客為原形而建！自問大膽嘅你，又敢唔敢去朝聖一下先？

Day 2

觀賞雲海：

時間緊逼，緊係要用盡每分每秒！想睇雲海，最佳上山時間就係清晨時分！山上受到水霧包圍，周圍嘅景色若隱若現，雲海美景盡現眼前！非自駕遊嘅朋友都唔怕，當地都有觀光的士接載客人去雲海展望台/容易看到雲海嘅地方！

都築蕎麥麵道場：

影完相就開始餓啦！「都築蕎麥麵道場」教你隶祖谷古式手法，由磨蕎麥開始，一手一腳自己打出美味蕎麥麵！仲可以即時食返～！蕎麥麵+時令新鮮山菜，樸素得嚟又有鄉土風情！食完之後仲有祖谷傳統民謡表演睇，夠晒滿足！

祖谷藤蔓橋：

呢條有人稱秘景嘅吊橋由藤蔓編織而成，跨越祖谷川，係日本三大奇橋之一！成條吊橋長45米，高達14米～一路行一路搖，行嗰陣記得扶穩呀！想打個靚卡嘅建議大家6月藤花盛開時/秋天紅葉時期去，個景仲靚！依家搭大巴/自駕遊都輕鬆去到㗎！

大步危峽（遊覧船）：

岩石控喺祖谷溪睇得唔夠喉嘅就一定要join埋大步危觀光船遊覽！全程30分鐘，成條路線位於吉野川下游～觀光船穿越溪谷，可以欣賞到周圍各種奇岩怪石+超狀觀嘅自然景色！四季都有唔同景色，無論春夏秋定冬，去到都有靚景！

Day 3

脇町卯建房屋街道・藍染體驗：

鍾意探究歷史嘅你去美馬市脇町啱晒！林立江戶時代中期至昭和中期興建嘅商鋪房屋，充滿舊日本風情！區內有美馬和傘、藍染工房、多間Café等～當中嘅藍染工藝更加係盛極一時！提早預約可以體驗親手做藍染工藝，體驗傳統工藝之餘仲可以留個紀念！

加茂大楠：

「加茂大楠」嘅樹齡差唔多成千年！係超級古老大樹呀！佢嘅樹枝生長方向好平均，以優美雄偉樹形而聞名，因此有日本第一嘅稱號！

美食推薦：

旋轉木偶串燒

外型同日本傳統木偶有幾分相似～將薯仔、豆腐、蒟蒻用竹籤串起，搽上味噌醬汁，再喺炭火上燒～味道絕配呀！

平石燒：

去到四國食平石燒都好有日本feel！喺平滑石頭上燒製鱒魚、豆腐、蔬菜等食材～冬天食暖笠笠！

半田素麵：

半田素麵特徵係粗身夠咬口，用吉野川嘅水+優質小麥製作而成！通常都係以燉煮/鍋物方式烹調，係罕有會喺冬天食嘅素麵！德島嘅素麵有成200年歷史，係當地名物嚟㗎！

酒店推薦：

和之宿酒店祖谷溫泉：

「祖谷溫泉飯店」超大亮點係夠隱蔽，好似置身於森林入面一樣！除咗1&2樓有唔同嘅温泉外，最特別喺搭纜車去浸溫泉～呢個體驗真係沒齒難忘呀！必去嘅仲有上年新建嘅「雲之上露台」同「雲遊天空之湯-SORA」！後者更係由大浴場改建而成嘅展望溫泉！點可以錯過呀！另外飯店會有免費接駁巴士／巴士直到，時間就比較少，記得上網check清楚先呀！

Sunriver大步危酒店：

「大步危酒店」都有內設露天溫泉風呂嘅客房！附近仲可以去到祖谷藤蔓橋、大步危等地方，玩完返酒店浸吓溫泉，全日嘅疲勞即刻消除呀！